Lions í Müllers Pakkhúsi á ólavsøku

Árliga ólavsøkuframsýningin hjá Lions Club Tórshavn er aftur í ár í Müllers Pakkhúsi í Havn, har bæði ólærd, sjálvlærd og onnur sýna fram síni listaverk. Sum altíð, er endamálið at savna saman pengar til eitt vælgerðarendamál.

Listaframsýningin í Müllers Pakkhúsi letur upp seinnapartin leygardagin 27. juli og heldur fram ólavsøkudag, ólavsøkuaftan og týsdagin 30. juli. Leygardagin er opið klokkan 16-20, ólavsøkuaftan og ólavsøkudag klokkan 14-20, og týsdagin er opið klokkan 16-20.

Men eingin framsýning uttan listaverk og longu nú ber til hjá áhugaðum framsýnarum at melda síni listaverk til framsýningina. Freistin at melda seg til ólavsøkuframsýningina í Müllers Pakkhúsi er sunnudagin 21. juli, og listaverkini kunnu latast inn í Müllers Pakkhúsi mikudagin 24. juli millum klokkan 16 og 18, og óseldir málningar skulu heintast aftur týsdagin 30. juli millum klokkan 20 og 21.

Nærri kunning um, hvussu ein kann melda seg til, sæst á www.lions.fo ella á www.facebook.com/lionstorshavn, og eins og gjørt hevur verið hesi síðstu árini, kann hvør framsýnari í mesta lagi hava trý listaverk við.

Leinkja til tilmeldingarskjal: https://lionstorshavn.wufoo.com/forms/p1ajjdth08le2f3/

Ágóðin av framsýningini fer óskerdur til eitt vælgerandi endamál ella felagsskap.
Hvør fær ágóðan í 2024 verður kunngjørt seinni á ww.lions.fo og aðrastaðnis.