Lions og listin á ólavsøku

Listaframsýningin, sum Lions Club Tórshavn trettanda árið á rað skipar fyri, verður hesa ferð opin í Müllers Pakkhúsi frá 28. til 30. juli, og nú nærkast tíðin, at listafólk skulu gera seg til reiðar, um tey ætla sær at vera við á framsýningini.

Freistin at boða frá luttøku á listaframsýningini hjá Lions, er úti mánadagin 9. juli, og áhugað listafólk kunnu seta seg í samband við Lions Club Tórshavn á lions.torshavn@hotmail.com ella á telefon 210299, og síðani fáa tey sendandi eitt tilmeldingarskjal at fylla út.

Áhugin fyri at sýna fram á ólavsøkuframsýningini í Müllers Pakkhúsi hevur verið sera stórur, so tí er tann avmarking sett á, at hvørt listafólk í mesta lagi kann hava trý til fimm listaverk við, alt eftir stødd.

Listaverk, ið skulu sýnast fram, skulu handast fyrireikingarnevndini, sum verður til staðar í Müllers Pakkhúsi mikukvøldið 25. juli frá klokkan 18 til 20. Óseld listaverk skulu heintast aftur í seinasta lagi mánadagin 30. juli millum klokkan 18 og 20.

Sum vant, fer vinningurin av listaframsýningini óskerdur til vælgerandi endamál. Nærri verður kunnað um hetta, tá framsýningin nærkast.